आज एक गंमतच घडली..
पुणे महानगर पालिकेच्या कामाचा एक भाग आणि १५ ऑगस्टची पूर्वतयारी म्हणून. सर्व शाळांमधील ध्वजस्तंभ रंगवण्याची आमची घाई चालू होती. यावेळी एक नवीन भाग आमच्या प्रभागात जोडला गेल्याने. त्या भागात असणारी एक प्राथमिक शाळा आम्हाला काही माहिती नव्हती.

शेवटी आम्ही त्या ठराविक भागात जाऊन पोहोचलो. त्या भागात ती एक छोटीशी प्राथमिक शाळा होती.
विचारपूस करावी म्हणून, तिथे असणाऱ्या एका महिलेला मी विचारलं.

इथे.. आतील भागात, काही शाळा वगैरे आहे का..?

त्यावर, ती महिला म्हणाली..
हो आतील बाजूस एक लहान मुलांची प्राथमिक शाळा आहे.
आम्हाला हवी असणारी प्राथमिक शाळा तीच आहे का. याची खातरजमा जमा करण्यासाठी, मी त्या महिलेला शाळेचं नाव विचारलं. आता, शाळेचा विषय चालू होता. म्हणून..त्या महिलेला मी पटकन म्हणून गेलो.

नाव काय आहे..?
तर, ती महिला म्हणाली. " बनसोडे "

बनसोडे हे नाव ऐकून मी जरा विचारात पडलो. आणि त्या महिलेला म्हणालो.
बनसोडे नाही हो..!
आम्हाला तर त्या शाळेचं नाव जाधव प्राथमिक विद्यालय, असं सांगितलं आहे.

त्यावर, थोडी लाजतच ती महिला म्हणाली,
शाळेचं म्हणताय व्हय, मला वाटलं तुम्ही माझंच नाव विचारलं आहे..!