आमच्या घरी, अगदी सुरवातीपासून मला मास मटणाचा रतीब होता.
माझे वडील मांसाहाराचे खूप शौकीन असल्याने. त्यांनी मला मटन या विषयातील प्रत्येक जिन्नस खाऊ घातला आहे. हाच कित्ता गिरवत, मी माझ्या मुलाला सुद्धा अस्सल खवय्या बनवला आहे.. ..

मी स्वतः.. चिकन पेक्षा मटणाला जास्ती प्राधान्य देत असतो. मटणात जी मजा आहे, ती चिकनला कधीच नाही. कधीतरी एक चेंज म्हणून, गावरान चिकन वगैरे ठीक आहे. पण या विलायती कोंबड्या काहीच कामाच्या नाहीत.
पण.. जेवण पटकन तयार होतंय म्हणून. या ब्रॉयलर चिकनला हल्ली फार मोठ्या प्रमाणात मागणी आहे. आणि मटणाच्या मानाने, हे चिकन जरा स्वस्त असतं. त्यामुळे सुद्धा चिकनला बऱ्यापैकी मागणी असते. चिकन हा विषय म्हंटल तर, मी फक्त चिकन तंदुरी या विषयाला प्राधान्य देतो. किंवा जास्तीत जास्त, चिकनच्या चायनिस डिशेश मी आवडीने खातो. चिकन बिर्याणी हा विषय सुद्धा मला फार आवडतो.
पण.. चिकन मसाला किंवा चिकन करी. या विषयाला मी नेहेमी नाक मुरडतच खात असतो. ते सुद्धा, अगदी जीवावर आल्या सारखं. माझ्या माहितीप्रमाणे, मी हॉटेलमध्ये आजवर कधीही चिकन करी किंवा चिकन मसाला विकत घेऊन खाल्लेला नाहीये.

तर.. दहाएक वर्षांपूर्वी, माझा मुलगा हे ब्रॉयलर चिकन खूप आवडीने खायचा. पण मटन म्हणालं, कि तो त्याला तोंडच लावायचा नाही. बायको सुद्धा माझ्या मुलाची बाजू घेऊन बोलायची..

जाऊद्या हो.. त्याला आवडतंय ना, मग चिकनच आणत जावा..!

पण.. हे काही माझ्या बुद्धीला पटत नव्हतं.
आता, मुलाचं चिकन प्रेम कसं सोडवायचं. आणि त्याला मटणाची आवड कशी निर्माण करायची..? या विचारात मी पडलो. आणि, मग मी या कामाच्या कसून मागे लागलो. काहीही झालं तरी, घरी भाजीला आणताना. मी मटनच घेऊन यायचो. आणि नियमाप्रमाणे माझा मुलगा सुद्धा मटणाला तोंड लावायचा नाही. आणि बायकोने सांगून सुद्धा, मी चिकन काही आणायचो नाही.
असं सलग दोन तीन महिने चालू होतं.

पण त्या तीन महिन्याच्या काळात, मी माझ्या मुलाला कधीही तू मटन खा म्हणून आग्रह केला नव्हता. शेवटी एके दिवशी, मुलगा स्वतः होऊन त्याच्या आईला म्हणाला.

" मम्मी मला पण मटन वाढ..! "

त्या दिवसानंतर, माझ्या मुलाला मटणाची इतकी प्रचंड आवड निर्माण झाली. कि आजच्याला तो सुद्धा चिकनला दुय्यम दर्जाचं स्थान देत असतो.

मी बरेचदा पाहत असतो.. काही महिला, त्यांच्या मुलाच्या मागे अगदी जबरदस्ती करून त्यांना खाऊ घालत असतात. आणि ते लहान मुल मात्र, तोंड वेडं वाकडं करून तोंडातील तो घास कसा थुंकून देता येईल. याच्या प्रयत्नात असतात.
अशावेळी, मी कित्तेक आयांना असा सल्ला दिला आहे. कि अरे त्याला जबरदस्ती करू नका, भूक लागल्यावर तो झक मारत खाईल.
पण आईचं प्रेम काही राहत नाही, ती बिचारी त्याच्यामागे जेवणाचा काला घेऊन, मागेमागे फिरतच असते. काही लोकं त्यांच्या मुलांवर खूपच अती प्रेम करत असतात.

पण एक गोष्ट मला तुम्हाला इथे सांगावीशी वाटतेय. तुम्हाला खरोखर तुमच्या मुलांमध्ये कोणत्याही प्रकारच्या आवडी निवडीसाठी बदल घडवून आणायचा असेल.
तर तुम्हाला.. मी अवलंबलेला मार्गच पत्करावा लागेल. कोणत्याही गोष्टीत यश मिळवण्यासाठी, त्याग फार महत्वाचा असतो.

" त्यागाशिवाय या जगात दुसरं काहीच मोठं नाहीये..! "