आजची तरुण पिढी..
माझ्यासारख्या वयाच्या लोकांना अगदी मूर्ख समजत असतात. त्यांना काय वाटतं,
कि..आपण काय करत आहोत, ते यांना काय समजणार आहे. पण शेवटी, आम्ही सुद्धा बाप माणसं आहोत,
हे, ते.. अगदी विसरूनच जातात.

किंवा, त्यांच्या मनाला हा साधा विचार सुद्धा शिवत नाही. कि, चुकून पूर्वी यांचा सुद्धा प्रेमविवाह झाला असेल. किंवा, कधीकाळी यांनी सुद्धा मुलींना लाडिक छेडछाड केली असेल. किंवा, कधीकाळी हे सुद्धा नवतरुण असतील. पण नाही ना, त्यांच्या मनाला हा विचार शिवतच नसावा.
असा माझा अंदाज आहे. आता कसं आहे..!

माझ्या निरीक्षणातून काहीच सुटत नसतं.

कॉलेजमध्ये शिकणाऱ्या तरुण मुला मुलींना मी नेहेमी पाहत असतो. आता, त्या मुला मुलींमध्ये निखळ मैत्री आहे. कि काही गडबड घोटाळा आहे, हे मी अगदी अचूक ताडतो. पण त्याकरिता, माझ्यासारखी माणसं वाचण्याची तुम्हाला सवय मात्र असायला हवी.
जाऊदेत, तुम्ही उगाच त्रास करून घेऊ नका. मी स्वतः शोधलेल्या काही ट्रिक्स तुम्हाला सांगतो.

१) समोरून येणाऱ्या मित्र मैत्रिणींच्या घोळक्यात, सगळी मुलं मुली एकमेकाच्या खांद्याला खांदे घासत. अगदी खेटून, हसत खिदळत, आणि.. छोट्या-छोट्या जोक्सवर एकमेकांना टाळ्या देत असतील. तर तुम्ही समजून जावा, हे सगळे एकमेकांचे अगदी निखळ आणि जिवलग मित्र आहेत. किंवा, आत्ताच कुठेतरी यांचा याराना वाढू लागला आहे.

२) समोरून येणाऱ्या जोडगोळी मध्ये, दोघेही एकमेकाशी साजेसं अंतर ठेऊन चालत असतील. बोलताना, अधेमध्ये एकमेकांना प्रश्नार्थक नजरेने पाहत असतील. किंवा, त्यांच्या चेहऱ्यावर हास्याची लकेर बिलकुल उमटत नसेल. ते दोघेही अगदी विचारात गूढ आणि भलतेच सिरीयस असतील. तर तुम्ही समजून जावा, हे दोघेही रँक होल्डर आणि अभ्यासू मित्र आहेत. अभ्यासातून वेळ मिळाला, तर यांच्यात सुद्धा प्रेम होऊ शकतं. पण, वेळ मिळाला तर, बरं का.

३) समोरून येणाऱ्या जोडगोळी मध्ये, दोघेही एकमेकांशी बोलताना अगदी मनमोकळे बोलत असतील. ते दोघेही, हसताना सुद्धा एक छोटीशी लाजरी झालर तुम्हा आम्हाला लगेच दिसून जाईल. पण हे दोघे, चालताना एकमेकांना बिलकुल खेटून चालणार नाहीत. किंवा.. टाळ्या देणे, चिमटे काढणे असले उद्योग कधीच करणार नाहीत. त्यावेळी तुम्ही समजून जावा.
कि हि, एका पहिल्या वहिल्या प्रेमाची निर्मळ सुरवात आहे..

४) समोरून येणाऱ्या जोडगोळी मध्ये, मुलगी आणि मुलगा दोघे सुद्धा अगदी बेफाम असतील. म्हणजे, मुलगी त्याला चिमटे काय काढतेय, तर तो तिची वेणी काय ओढतोय. तर मधेच, चालता-चालता ती मुलगी त्याच्याकडे प्रेमभर्या लाडिक नजरेने काय पाहतेय. आणि त्यावर, तो मुलगा ताबडतोब तिचे गालगुच्चे काय घेतोय.
त्यावेळी.. तुम्ही समजून जावा. इथे सगळं काम तमाम झालं आहे. गाडी अगदी योग्य रुळावर धावत आहे.

५) समोरून येणाऱ्या जोडगोळी मध्ये, दोघे चालत येत असताना. खासकरून मुलगी, त्या मुलाच्या मनगटाच्या थोडील वरील बाजूस, तिच्या हाताच्या पंजा अगदी हळुवार तिथे टेकवून, आणि दुसरा हात त्याच्या त्याच हाताच्या दंडाला धरत, त्याला अगदी चिटकून. आणि, त्याच्याकडे पाहत थोडसं मंद हसत तर मधेच थोडी चिंताग्रस्त होत त्याला खेटत निघालेली असते.
आणि, तो मुलगा तोंड वर करून बिनधास्त निघालेला असतो.
त्यावेळी.. त्या मुलाने, तिच्यात थोडासा इंटरेस्ट कमी केलेला आहे. तो तिच्यावर, थोडासा खट्टू झाला आहे. असं तुम्ही बिनधास्त समजून जावा.

६) हमरस्त्यावर कोणाचीही तमा न बाळगता,
एखादी मुलगी.. त्या संभाव्य मुलासमोर जोरजोरात रडत आणि भांडत असेल. आणि, तो मुलगा तिला कोणतीही प्रतिक्रिया न देता निर्विकारपणे उभा असेल. त्यावेळी, तो मुलगा त्या मुलीशी फिजिकल रिलेशनशिप ठेवून मोकळा झाला आहे. आणि, प्रेमाच्या खोट्या आणाभाका घेऊन, एकमेकांना लग्नाची वचनं देऊन, आता नाही होऊन पडला आहे. हे समजायला तुम्हाला बिलकुल वेळ लागणार नाही.

हे झाले.. सुपर सिक्स..!

तर परवा.. मी पुण्यातील एका सिग्नलवर असताना. माझ्या एका ओळखीतल्या व्यक्तीची मुलगी. तिच्या मित्रासोबत निघाली होती. त्यावेळी ती मुलगी पाच नंबरच्या मोडमध्ये होती. मला तिला आवाज द्यावासा वाटत होता. पण मी स्वतःला थोडं थांबवलं. पण अचानक माझ्या तोंडून ते वाक्य बाहेर पडलं. अगं XXX कुठे निघाली आहेस..? त्यावेळी, त्या मुलीचा चेहेरा अगदी पाहण्यासारखा झाला होता. ती मुलगी तशीच माघारी फिरली, आणि मला म्हणाली..
अहो काका.. त्या मुलाला हे XXXXX कॉलेज माहिती नव्हतं. मी ते त्याला दाखवायला त्याच्या सोबत आले होते. शेवटी मी सुद्धा वेड्याचं सोंग घेतलं. आणि तो विषय तिथेच सोडून दिला.

कालपरवा.. ती मुलगी मला प्रत्यक्ष भेटली आणि म्हणाली. काका, ते तुम्ही कोणाला सांगितलं नाही ना..! मी म्हणालो.. त्यात सांगण्या सारखं काय होतं..?
तर म्हणाली.. आमचा ब्रेकअप झाला आहे. प्लीज कोणाला सांगू नका. मी तुमच्या पाया पडते.
त्यावेळी.. मी फक्त तिच्या पाठीवरून हात फिरवला. आणि तिला म्हणालो, बेटा.. एकदा ठेस लाऊन घेतली आहेस. पुन्हा, एखादी मोठी जखम करून घेऊ नकोस. नाहीतर.. ती जखम, तुमच्या सगळ्या घरादाराला चिघळऊन टाकेल..!

हुल्लड वयात, मुलं अशा चुका हमखास करत असतात. जो चुकणार, तो माणूस असतो.
अन्यथा.. जनमानसात " देव " लोकांची बिलकुल कमतरता नसती..!