ऐन विशीत असताना, मी हा विनोद ऐकला होता. त्यावेळी, हा विनोद ऐकून मी खूप हसलो होतो. पाहूयात तुम्हाला हसू येतंय कि नाही.

एक सुखवस्तू त्रिकोणी कुटुंब असतं. आईवडील निवृत्तीचं जीवन व्यतीत करत असतात. तर त्यांच्या एकुलत्या एका मुलाचं लग्न झालेलं असतं. सगळं घर अगदी गुण्यागोविंदाने नांदत असतं. या उभयतांच्या मुलाला.. एका ऋषी महाराजांनी, विशिष्ट काष्ठ औषधापासून बनवलेल्या काही गोळ्या दिलेल्या असतात. त्या गोळ्या सेवन केल्याने, ते दोघे नवरा बायको आजन्म चिरतरुण राहणार असतात. हि गोष्ट, त्या मुलाच्या वडिलांना समजते. पण मुलाला मिळालेली संजीवनी आपण कशी मागावी..? म्हणून, ते गप्प बसून असतात.

एके दिवशी.. कंपनीच्या कामाने तो मुलगा पाच सहा दिवसांकरिता बाहेरगावी जातो. तेथील काम उरकून तो जेंव्हा घरी येतो. घरात आल्याबरोबर, त्याला फक्त त्याची बायको दिसते.
आणि बघतो, तर घरामध्ये त्याचे आईवडील नसतात. तो तडक तसाच घरामध्ये जातो,
तर.. घरामध्ये, एक सुंदरशी दिसणारी अनोळखी महिला तिच्या मांडीवरील लहान मुलाला खेळवत बसलेली असते.

हा प्रकार पाहून, तो अगदी चक्रावून जातो. आणि त्याच्या बायकोला विचारतो.
आपल्या घरात, हि सुंदर दिसणारी महिला कोण आहे..?
त्यावर, त्याची पत्नी म्हणते..

ती, तुमची आई आहे..!

हे न पेलणारं उत्तर ऐकून, तो भलताच अवाक होतो. त्याची बायको म्हणते, ऋषी महाराजांनी चिरतरुण राहण्याच्या ज्या गोळ्या आपल्याला दिल्या होत्या. त्यातील, सासुबाईंनी एकदम दहा गोळ्या खाल्ल्या. आणि, त्यांना हे तरुणपण प्राप्त झालं.
त्यावर मुलगा म्हणतो..

पण, माझे पप्पा कुठे आहेत..?

त्यावर त्याची बायको म्हणते. तुमच्या पप्पांनी त्यातील एकदम वीस गोळ्या खाल्ल्या, त्यामुळे ते अगदी लहान बाळ होऊन बसले आहेत.

ते काय, तुमच्या आईच्या मांडीवर तुमचे पप्पाच आहेत..!