मी ज्याठिकाणी, मराठी टायपिंग शिकण्याचा कोर्स लावला आहे.

तेथे, मला टायपिंग शिकवणारे सर आणि मॅडम असे दोघे आहेत. हे अगदी, तरुण वयाचं नवदाम्पत्य आहे. दोघेही, दिसायला कमालीचे सुंदर आहेत. थोडक्यात, एक दुजे के लिये. ती, खूपच अनुरूप जोडी आहे.
आज, मी टायपिंग करत बसलो होतो. आणि, त्या दोघांमध्ये काहीतरी कुजबुज झाली.
सरांनी मॅडमला काही पैसे दिले. 
अनायषा, आता आखाड महिना सुरु झाला आहे. त्यामुळे.. बहुतेक, त्या दोघांमध्ये, त्यांच्या घरातील संध्याकाळच्या जेवणाचा विषय झाला असावा. आणि, काहीतरी 'रंगीत' भाजी खरेदी करण्याकरिता मॅडम ने सरांकडून पैसे घेतले असावेत. हे मी बरोबर ताडलं.
जेंव्हा मॅडम पैसे घेऊन क्लासच्या बाहेर निघाल्या होत्या. तेंव्हा, त्या जेमतेम क्लासच्या दरवाजा पर्यंत पोहोचल्या असाव्यात. तेवढ्यात, सर त्यांना म्हणाले.
.
" काहीतरी चांगलं कर हं..! "

सरांच्या या वाक्यावर, मॅडमने काहीएक न बोलता. त्यांना फक्त मानेने होकार दिला. आणि, त्या तेथून निघून गेल्या.

मानलं गड्या मी त्या बाईला..!

काही तरी चांगलं कर, म्हणजे आता आपल्याला नेमकं काय बनवायचं आहे..?
आणि, आपल्या नवऱ्याची नेमकी काय आवड आहे..?
ते.. त्यांना, ताबडतोब कळून गेलं होतं. ट्युनींग असावं तर असं..
नाहीतर,
त्याठिकाणी.. आमची सौ असती, तर.. लगेच मला म्हणाली असती.

" चांगलं म्हणजे, नेमकं काय बनवू..? "