राझी..

प्रसिद्ध दिग्दर्शक, मेघना गुलझार यांनी हा सिनेमा सिनेरसिकांच्या भेटीला आणला आहे.
हरिंदर सिक्का, यांच्या " कॉलिंग सेहमत " या कादंबरीवर हे संपूर्ण कथानक उभं राहिलं आहे. भारत पाकिस्तान या विषयावर काही वाचायला, ऐकायला किंवा पाहायला मिळणार असेल. तर, हि संधी कोणीच दवडू इच्छित नसतं. प्रत्येक भारतीय व्यक्तीसाठी हा फार मोठा कळीचा मुद्दा असतो.

भारत वर्षात आजवर शेकडो गुप्तहेर व्यक्ती निर्माण झाल्या असतील. ज्यांनी आपल्या प्राणाची बाजी लावत देश सेवेसाठी आपल्या जीवाचं बलिदान दिलं असेल. त्यातील सर्वच व्यक्ती ज्ञात असतील असं नाही. काही व्यक्ती तर, आपल्या मागे कोणताच सुगावा किंवा मागमूस न ठेवता काळाच्या पडद्याआड गेले असतील. अशा व्यक्तीचं बलिदान हे अगदी व्यर्थ ठरलं जातं. कारण, त्यांनी केलेली कामगिरी सांगायला कोणीच उपलब्ध नसतं. पण ते.. देश सेवेसाठी खऱ्या अर्थाने हुतात्मा आणि पुण्यात्मा झालेले असतात.
पण सुदैवाने त्यातील काही व्यक्ती, हे सर्व उपद्व्याप करून सुद्धा, पुन्हा मायदेशी सुखरूप परततात. त्यावेळी ते एक जिवंत कहाणी बनून राहतात.

खरं सांगायला गेलं तर.. या गुप्तहेर लोकांची माहिती कधी उघड केली जात नाही. नाहीतर, त्यांच्या जीविताला धोका उद्भवू शकतो. पण काही काळ लोटल्यावर, सदर व्यक्ती काळाच्या पडद्याआड गेल्यावर. कोणतेही ठोस धागेदोरे न उलघडता, त्या विषयांवर काही तथाकथित माहित्या उपलब्ध करून, असे विषय हाताळले जातात.
राझी हा सिनेमा सुद्धा अशाच एका व्यक्तिरेखेवर आधारित आहे. पण नेहेमीचे पुरुषी मक्तेदारी असणारे मुद्दे खोडून काढत, यावेळी प्रमुख पात्रात, गुप्तहेर म्हणून एका स्त्रीने तिचं कर्तुत्व पणाला लावलं आहे. त्यामुळे हा सिनेमा, आपल्याला फारच हवाहवासा वाटून जातो.

या सिनेमाला १९७१ च्या युद्धाची पार्श्वभूमी आहे. गाझी अटॅकच्या विषयावार घडणारं हे संपूर्ण कथानक आहे. पाकिस्तानात व्यापार करणारा एक भारतीय मुस्लिम व्यक्ती, ज्याच्या नसानसात देशप्रेम वाहणाऱ्या त्यांच्या तीन पिढ्या इथे दाखवल्या केल्या गेल्या आहेत. त्यातील हि तिसरी पिढी, या सेहमतच्या नावे अधोरेखित केली गेली आहे.
हा व्यापारी, रजत कपूर.. पाकिस्तानातील एका उच्चभ्रू अशा फौजी कुटुंबात आपल्या मुलीचं, सेहेमतचं लग्न करून एक भारतीय गुप्तहेर बनवून पाठवून देतो.
तिथे ती आपल्या जीवावर उदार होऊन, पाकिस्तानात करत असलेली हेरगिरी, आणि त्याचं.. तिच्या घरातील लोकांना त्यांची भनक लागू न देणं, आणि इतर काही करामती पाहताना अंगावर अगदी रोमांच उभे राहतात. सिनेमा सुरवातीपासून आपली मजबूत पकड ठेऊन राहतो. परंतु, सिनेमाचा शेवट खूपच गुंतागुंतीचा आणि चमत्कारिक दाखवला आहे.

धर्माच्या किंवा व्यक्तीच्या अगोदर देश फार महत्वाचा असतो, हे त्रिकालाबाधित सत्य या सिनेमात दाखवलं गेलं आहे. पण ते सत्य पाहताना, मनाला फार मोठा चटका लाऊन जातं. भारतीय अधिकारी जीवाची बाजी लावत, शत्रूच्या गोटात जाऊन काय-काय करत असतात. त्याची आपण कल्पना सुद्धा करू शकत नाही. त्याकरिता असे चित्रपट पाहणं हे फार गरजेचं आहे.

सेहमत सारख्या एवढ्या मोठ्या कर्तृत्ववान महिलेला, शेवटी.. अगदी हतबल आणि एकाकी दाखवलं गेलं आहे. ते काही माझ्या मनाला पटलं नाही. पाकिस्तानात एवढी मोठी कामगिरी करून आलेली महिला. नंतरच्या आयुष्यात सुद्धा खूपच सुपरफास्ट दाखवायला हवी होती. हे पूर्णतः माझं मत आहे.

आलीया भट आणि विकी कौशल यांनी प्रमुख भूमिकेत फारच सुंदर अदाकारी केली आहे. बाकी एकुणात, सिनेमा अगदी उत्कृष्ट आहे..!