पद्मावत.. नाही, पद्मावती..!
संजय लीला भन्साळीने दाखवून दिलेली, हि एक अप्रतिम कला आणि लीला आहे.

भारत वर्षात.. प्रत्येक गोष्ट हि विरोधाला विरोध म्हणून फार मोठ्या प्रमाणात भूषवली जाते.
खरं तर या सिनेमाचं नाव.. " पद्मावती " हेच असायला हवं होतं.

प्रत्येक वाचक व्यक्तीसाठी, इतिहास हा अत्यंत रटाळवाणा विषय आहे, माझ्या माहितीप्रमाणे फारच कमी लोकांना त्यात मनापासून रस असावा. इतिहास जाणून घेण्यासाठी एवढी मोठी जाडी भरडी पुस्तकं कोणी वाचावी..? हा सर्वात मोठा आणि कळीचा मुद्दा आहे. पण इतिहास हा शेवटी इतिहास असतो. आणि थोड्या प्रमाणात का होईना, त्याचा प्रत्येकाला अभ्यास हा असायलाच हवा. आणि ते प्रत्येक देशवासीयांसाठी अनिवार्य सुद्धा आहे.
किमान त्याकरिता तरी, असे ऐतिहासिक सिनेमे निर्माण झालेच पाहिजे. आणि ते सर्वांनी पाहिले सुद्धा पाहिजेत. असं माझं प्रामाणिक मत आहे.

मेवाडच्या राजा राणीचा प्रणय प्रसंग चोरून पाहणाऱ्या व्यक्तीमुळे, येवढा मोठा इतिहास घडेल. याची कोणाला सुतराम सुद्धा कल्पना आली नसेल. शेवटी सगळ्या गोष्टी, स्त्री आणि तिचं सौंदर्य यापाशीच येऊन थांबतात. आणि हा विषय अगदी आजतागायत चालू आहे.
राणी पद्मावती आणि राजपूत राजा रत्नसिंह यांचा प्रणय प्रसंग चोरून पाहणारा व्यक्ती. खुद्द त्यांचा राजगुरु असतो. पद्मावतीच्या रूपाने त्या ब्रम्हचारी गुरूंना सुद्धा घायाळ केलेलं असतं. त्यामुळे त्याच्याकडून हे दुष्कृत्य घडतं. आणि या चौर्य कर्मात पकडला गेल्यावर, राणी पद्मावतीच्या आदेशानुसार त्याला मेवाड प्रांतातून हद्दपार केलं जातं. क्रोधाच्या अग्नीत जळफटून गेलेला गुरुदेव, झालेल्या अपमानाचा बदला घेण्यासाठी. आल्लाउद्दीन खिलजीला जाऊन मिळतो. आणि, त्याच्यापाशी राणी पद्मावतीच्या सौंदर्याची मनभरून तारीफ करतो.
आणि राणीच्या सौंदर्याचं गुणगान ऐकून, निव्वळ ती सौंदर्यवती आपली व्हावी. या इर्षेपायी अल्लाउद्दीन खिलजी मेवाड प्रांतावर स्वारी करतो, असा सरळ आणि सोपासा हा इतिहास आहे.

पद्मावत मध्ये, दीपिकाचं राणी पद्मावतीच्या रुपात अप्रतिम असं सौंदर्य दाखवण्यात सिनेनिर्माता यशस्वी झाला आहे. शिवाय, युद्धकौशल्य पारंगत अशी राणी आणि तिची महती दाखवण्यात सुद्धा ते कमालीचे यशस्वी झाले आहेत. एक अप्रतिम सौंदर्य लाभलेली राणी, तसेच एक युद्ध निपुण धुरंधर राजकारणी स्त्री म्हणून सुद्धा राणी पद्मावती कडे पाहण्याची एक वेगळीच उंची या सिनेमाने गाठली आहे. भले राजपूत पुरुष एकवचनी असतील, पण वेळ आल्यावर कुट नीती सुद्धा वापरावी लागते. हि अचाट बुद्धी त्या राणी पद्मावतीच्या अंगी दाखवण्यात आली आहे.
बंदिवान झालेल्या नवऱ्याला वाचवण्यासाठी प्रयत्नांची पराकाष्ठा, आणि.. छुप्या रणनीतीने अचूक डावपेच कसे आखले जावेत. याचं पुरेपूर ज्ञान राणी पद्मावती यांच्याकडे होतं..
आपल्या नवऱ्यावर जीवापाड प्रेम करणारी पद्मावती, महाराजांच्या मृत्यूनंतर सुद्धा आपलं शील भ्रष्ट होऊ नये. यासाठी निकराने लढा देत.. राज्यातील लहान मुली, तरुणी, विवाहिता, गर्भवती स्त्रिया, वृद्ध महिला ते खुद्द राणी पद्मावतीने पुकारलेला आणि स्वीकारलेला जोहर अगदी वाखाणण्याजोगा आहे. शील रक्षणासाठी, आजच्याला एवढी मोठी किंमत कोणी खचितच मोजावी. असा हा कठीण विषय आहे.

रणवीर सिंग आणि, शाहीद कपूर यांनी सुद्धा सिनेमात अगदी दमदार भूमिका सादर केल्या आहेत. परंतु, हा सगळा सिनेमा एकट्या दीपिकाने खाऊन टाकला आहे.
राजपूत संघटना, किंवा.. करणी सेना, यांनी या सिनेमा विरुद्ध पुकारलेलं बंड खरोखरच बिन बुडाचं होतं. कोणत्याही विषयाचं अर्धवट ज्ञान हे फारच घातक असतं.
एक इतिहास म्हणून, मेवाडचा जोहर मी ऐकून होतो. पण राणी पद्मावतीचा हा सगळा इतिहास, आजवर मला सुद्धा माहित नव्हता. पण या सिनेमामुळे, एक जुना जाणता विषय, आज माझ्या मनाला फार मोठा चटका लाऊन गेला. सिनेमाचं पद्मावती हे नाव रद्द करून, त्याला पद्मावत हे नाव देण्याने. त्या महान राणीचं, खरोखर एका मुत्सद्दी राजामध्ये रुपांतर झालं आहे. असं म्हंटलं तर ते वावगं ठरू नये.

( टीप :- सिनेमा टू डी मधेच पाहा. थ्री डी मध्ये, खूपच अंधार-अंधार वाटतो. )