उन्हाळा सुरु झाला.. कि सर्वात मोठ्या प्रमाणात रस्त्यावर दिसणारा विषय म्हणजे.
पाण्याचे टँकर..!
हे पाण्याचे टँकर तहानलेल्या गावांना आणि शहरी भागातील काही भागांना पाण्याचा पुरवठा करत असतात. तसं पाहायला गेलं तर, हा विषय फार गंभीर आहे. पाण्याची भीषण टंचाई कशामुळे निर्माण झाली..? हे पाहायला गेलो तर, सतरा प्रश्न आपल्या समोर आ वासून उभे राहतील.
असो.. मला त्याविषयी काही बोलायचं नाहीये.

पण कसं आहे,
जगाच्या दृष्टीकोनातून आजच्याला सर्वात महाग वस्तू कोणती असेल..?

तर, ती म्हणजे तेल.!

मग त्यात, सुरवातीला.. पेट्रोल त्यानंतर डीझेल आणि मग रॉकेल. अशी क्रमवारी लागते. बाकी ऑईल वगैरे सुद्धा आहेतच.
आजच्याला.. रॉकेल हा विषय काही खासा राहिला नाहीये. कारण रेशनकार्डवर सुद्धा हल्ली अगदी मोजक्या व्यक्तींनाच रॉकेल दिलं जातं. कारण, हल्ली कोणी इतकं गरीब उरलं नाहीये. कि त्याच्या घरात गॅस शेगडी किंवा गॅस सिलेंडर नसेल.
मग, सरकारी खजिन्यातून येणारी ती पेट्रोलियम द्रव्य वस्तू बाजारात आल्यावर नेमकं कोण घेत असेल. आणि ती खरेच येत असतील का..? हा संशोधनाचा विषय ठरावा..!
मी स्वतः.. लहान असताना, पेट्रोल आठ रुपयांनी विकत घेतलेलं मला चांगलं आठवत आहे. आता त्याचे ऐंशी रुपये झाले आहेत. आणि हा प्रताप.. अवघ्या, तीस पस्तीस वर्षात झाला आहे. जाऊदेत माझा मूळ मुद्दा हा सुद्धा नाहीये. आज मला एका वेगळ्याच विषयावर बोलायचं आहे. अजूनही प्रत्येक व्यक्तीला काय वाटतंय, कि..

#पाणी_स्वस्त_आणि_फुकट_आहे..!

त्यांचं हि बरोबर आहे. नगरपालिका आपल्याला पाणी अगदी घरापर्यंत आणून देतंय. त्यामुळे, त्याची कोणालाच किंमत नाहीये. झोपडपट्टी मध्ये तर, बाराही महिने पाण्याची होळी असते. तिथे राहात असणारे गर्दुल्ले किंवा बेवडे तोटीचे नळच चोरून नेतात. आणि मग काय, दिवसभर पाणी वहातच राहतं. सगळीकडे आनंदी आनंद असतो.
त्यात हे जे पाण्याचे टँकर असतात ना, ते सुद्धा डीझेल किंवा पेट्रोल वाहतूक करून झालेले, जुने गळके टँकर असतात. जे पाणी वाहतूक करताना, संपूर्ण रस्त्यावर पाण्याचा शिडकावा करत जात असतात. काही लोकांच्या हे ध्यानात येत नाही, कि.. एकवेळ पेट्रोल किंवा डीझेल आपल्याला मिळालं नाही. तर आपल्या जीवन पद्धतीत नेमका काय फरक पडणार आहे.?
पेट्रोल किंवा डीझेल मिळालं नाही तर, किमान आपण नक्कीच मरणार तरी नाही. पण पाणी मिळालं नाही तर.?

तर.. आपला मृत्यू अटळ आहे.!

पाणी इतकं स्वस्त नाहीये हो..तहान लागल्यावर पेट्रोल, डीझेल कामाला येत नाही. त्यासाठी आपल्याला पाणीच हवं असतं. डीझेल पेट्रोल नाही पुरलं तरी चालेल. पण हि वसुंधरा असेपर्यंत पाणी तेवढं सर्वांना पुरलं पाहिजे. त्याकरिता वेळीच पाण्याची किंमत करा. आणि ते जपून वापरा.

नाहीतर आहेच मग.. राम कृष्ण हरी..!!