#सोनू_तुला_माझ्यावर_भरवसा_नाय_का...!

हे, टाईमपास गीत ज्यावेळी बाजारात आलं. त्यावेळी, या गाण्याची मला काहीच माहिती नव्हती.
नाही म्हणता, या गाण्याचं श्रेय लाटत बऱ्याच व्यक्तींनी प्रसिद्धी सुद्धा मिळवली. तर काही व्यक्तींना जनतेच्या रोषाला सुद्धा सामोरं जावं लागलं.

एकेदिवशी, मी कामावरून घरी आलो.
आणि माझ्या बायडीने, अगदी हौशेने मला त्या ओरीजनल गाण्याचा विडीओ दाखवला.
नाही म्हणता, मला तो विडीयो आवडला जरी नसला. तरी सुद्धा, बायकोला कळू नये म्हणून.
मी सुद्धा तिला म्हणालो. एक नंबर गाणं आहे गं.

त्यावर ती मला म्हणाली.. हे गाणं कोणी लिहिलं आहे, ते तुम्हाला काही माहिती आहे का..?
मी म्हणालो.. नाही गं, या गाण्याचा आणि त्याच्या कवीचा माझ्याशी काडीमात्र संबंध नाहीये.
तर म्हणाली.. तुमचा काही भरवसा नाही बाबा. तुमच्या ओळखीतल्या एखाद्या कवी मित्राने हे गीत आपल्यावर लिहिलं असेल. तर काही सांगता येत नाही.
त्यावर, मी थोडावेळ अवाक झालो. हा काय विषय असावा..? म्हणून.. तेच गीत, मी पुन्हा एकदा कान देऊन आणि मन लाऊन ऐकलं. आणि मी चक्क जागेवर उडालोच. माझ्या बायकोच्या मनात आलेली शंका अगदी रास्तच होती.

माझी बायको तशी काही जास्ती ढेपसी नाहीये, पण खात्यापित्या घरची असल्याने थोडी जाडजूड नक्कीच आहे. शिवाय, मी टकल्या आणि माझा आवडता विषय चकल्या हे तर सर्वांना माहितीच आहे. लिंबू हा विषय प्रतीकात्मक जरी असला, तरी..माझ्या मुलाचा चुलतभाऊ सुद्धा चांगलाच लंबू आहे. आणि शेवटची सर्वात दुर्मिळ गोष्ट म्हणजे..

आमच्या प्रतीकला सुद्धा, आम्ही सगळे लाडाने #सोनू म्हणत असतो...!