माझी आजची ( गेल्या रविवारची ) जेवणाची थाळी खूपच रंगारंग होती.
एका ताटात मावणार नाही इतक्या पदार्थांची इथे रेलचेल आहे.
एका वाटीमध्ये अळणी मटणाचा खुमासदार रस्सा, तर दुसऱ्या वाडग्यात झणझणीत तांबडा रस्सा, आणि त्यात डोकावत असणारे मटणाचे लज्जतदार तुकडे. तर तीसऱ्या वाटीत, तर्रीबाज लालभडक मटन मसाला. जेवताना तोंडी लावण्यासाठी उकडलेल्या अंड्याचे दोन भकले.
आणि.. एका भल्या मोठ्या वाडग्यात अस्सल बासमती तांदळापासून बनवलेली सोनेरी रंगाची सुगंधी मटन बिर्याणी. इतक्या सगळ्या पदार्थांनी ताटाची सगळी जागा व्यापली असल्याने, भाकरी आणि कांदा लिंबूसाठी एक स्वतंत्र वेगळी डिश द्यावी लागत असते.

" हॉटेल जगदंब " जुन्या पुणे मुंबई महामार्गावर असणाऱ्या मांसाहारी हॉटेल ( निगडी उड्डाणपूलाच्या अलीकडे ) मधील हि लाजवाब थाळी आहे.
येथील जेवण अगदी उत्कृष्ट आणि स्वादिष्ट होतं, पण बैठक व्यवस्थेत असणारी त्रुटी.
म्हणजे.. एसी, पंखा, किंवा कुलरच्या अभावामुळे जेवताना अंगातून घामाच्या धारा वाहत होत्या.
याठिकाणी स्वतंत्र फेमिली रूम सुद्धा आहे. जेवणात मटणाची मात्रा खूप मोठ्या प्रमाणात असते. मटन वाढताना हॉटेल मालकाकडून बिलकुल हयगय केली जात नाही. आणि हि भरगच्च स्पेशल मटन थाळी फक्त तीनशे रुपयांना आहे.

एका थाळीत एक माणूस पक्का भरपेट होऊन जातो. त्यामुळे अतिरिक्त असं काही मागवावं लागत नाही. आज जेवताना पहिल्यांदाच असं घडलं, कि माझ्या थाळीतील मटणाचे दोन पीस मला उष्टे सोडून द्यावे लागले. खूप मस्त जेवण असतं, एकदा झटका मारून याच.