मोठ्या लोकांचं, सगळंच मोठं असतं..!

काय आणि कुठला तो जस्टीन बिबर,
तेवीस वर्षाचं ते कोवळं पोरगं. तुम्हाला खरोखर सांगतो, अगदी त्याच दिवशी मला ह्या पोर्याच्या नावाचा साक्षात्कार झाला. नाहीतर, त्या दिवसापर्यंत हे नाव माझ्या गावी सुद्धा नव्हतं. अशा एक्स्ट्रॉ माहिती बाबतीत, मी बराच मागास माणूस आहे बरं का.

त्या सचिन तेंडुलकरचा मुलगा अर्जुन तर.. अगदी त्याचा मोडलेला पाय सांभाळत, कुबड्या घेऊन या इव्हेंटला हजर राहिला होता. ( बहुतेक जबाबदारी असावी. ;) ) बाकी, इतर बरेच लक्ष्मीपुत्र सुद्धा या कार्यक्रमाला आवर्जून हजर राहिले असतीलच. तो तर त्यांचा स्टेटस फंडा असतो ना.
अशा कार्यक्रमांना, यांना मुद्दाम हजेरी लावावी लागत असते. सचिनच्या मुलीने तर, त्याच्याबरोबर सेल्फी काढल्याचे फोटो सुद्धा वर्तमानपत्रात पहिल्या पानावर झळकले होते. मज्जा असते नाही एकेकाची..

या लाईव्ह शोला, सर्वात मोठं, ७५०००₹ रुपयाचं एक तिकीट होतं. तुम्हाला खरोखर सांगतो, हि सगळी अतिरिक्त पैसा कमावणाऱ्या लोकांची कामं आहेत. आपल्या सारख्या सर्वसाधारण लोकांनी या भागात कधी फिरकू सुद्धा नये. पैसा आला, कि धनवान लोकांना अशा गोष्टी सुचतातच.
यावरून.. मला एक जुनी घटना आठवली.
अचानक धनलाभ झालेला माझा एक मित्र. स्लम एरियात राहत असताना, त्याच्या बायकोला तो सायकलवर डबलसीट घेऊन माझ्या समोरून कित्तेक वेळा तरी गेला असेल.
त्यानंतर अचानक.. तो अतिश्रीमंत झाल्यानंतर, त्याची बायको आता कार शिवाय फिरत नाही. आणि.. किट्टी पार्टी शिवाय खेळत नाही.
त्यांची मुलं तर, आम्हाला अगदी ओळखेनासे झालेत.

" पैसा रे पैसा, तेरा रंग कैसा..? "

खरं तर..हातावरचं पोट असणारे तुम्ही आम्ही लोकं, अशा इव्हेंट अगदी स्वप्नात सुद्धा पाहू शकत नाही. आणि चुकून जर आपण स्वप्नात जरी त्या पाहिल्या तर..
रात्रभरातल्या झोपेत.. किमान दोनचार वेळा तरी दचकून आणि चावळून आपण झोपेतून नक्कीच जागे होऊत. हि अगदी सत्य परिस्थिती आहे. कारण.. आपल्या भारतामध्ये,
पंच्याहत्तर हजार रुपये इतक्या मोठ्या रकमेचं. काही लोकांचं वार्षिक उत्पन्न सुद्धा नाहीये.
तर मग, हा फुकाचा शाहानपना आम्ही का करतोय..?

किती मोठा गवगवा केला, कोठ्यावधी रुपयांचा चुराडा झाला, आणि, सरतेशेवटी बोंबाबोंब झालीच.
हा प्रकार मला काही नवीन नाही, माझ्या माहितीप्रमाणे सगळेच सिंगर लोकं याप्रकारची नकली गायकीची कामं सर्रास करत असतात. नाहीतर, भर चौकात भोकाड काढत बसल्यावर त्यांच्या गळ्याची वाट लागलीच म्हणून समजा. मध्यंतरी, आपल्या विदेशी म्युजिक वाल्या सैराट अजय-अतुल ने सुद्धा सर्वांना, याड लावत भर इव्हेंट मध्ये लोकांना येडं करून सोडलं होतं. काही लोकं तर म्हणाले.. मायकल जॅकसन सुद्धा अगदी असच करायचा. अजून किती दिवस आपण मुर्खात जमा होणार आहोत.?

एवढं सगळं घडतंय. तर, आपल्या घरात बसून युट्युबवर त्यांचे व्हिडिओ पाहा ना..! आम्ही तर तेच करतो बाबा. क्रिकेट सुद्धा, आम्ही फक्त टीव्हीवरच पाहत असतो. हे सगळं करण्याची माझी ऐपत नाहीये अशातला भाग नाही, विनाकारण नको तो मनस्ताप कशाला करून घ्या. आणि, मनातील भडभड व्यक्त करण्याचं याशिवाय दुसरं साधन सुद्धा नाहीये ना..!